Nisaka na ngadto sa 38 ang ihap sa mga namatay sa magnitude 7.8 nga linog nga miigo sa baybayon sa Sarangani niadtong Lunes sa buntag, Hunyo 8.
Basi sa pinakabag-ong report gikan sa Office of Civil Defense (OCD), upat ka tawo ang nagpabilin nga nawala samtang 478 ang gitaho nga nasamdan.
Sumala sa OCD, ang General Santos City, Sarangani, ug South Cotabato ang lakip sa mga grabeng naapektuhan sa linog.
Diin daghang mga pamilya ang napugos usab sa pagbakwit tungod sa kadaot nga gipahinabo sa katalagman sa ilang mga balay.
Ang gibanabanang kadaot sa imprastraktura sa Davao Region ug SOCCSKSARGEN mokabat sa kapin P562.8 milyon.
Sa pagkakaron, padayon gihapon ang mga aftershock ug nakatala na ang Philippine Institute of Volcanology and Seismology (PHIVOLCS) og 1,209 ka aftershocks sukad sa linog, diin ang ilang kusog gikan sa magnitude 1.3 ngadto na sa 6.4.
Ingon man nga nakatutok karon ang mga awtoridad sa search, rescue, ug retrieval operations aron matabangan ang mga naapektuhan ug makit-an ang mga nawala nga indibidwal.
Kapin sa 2,700 ka mga personahe gikan sa Armed Forces of the Philippines, Philippine National Police, ug Bureau of Fire Protection ang gipadala sa mga apektadong lugar aron motabang sa operasyon.
