CEBU CITY- Dili matawag nga isolated case ang linuog nga pagpusil-patay kang Police Captain Joel Deiparine sa CIDG Regional Field Unit 7 nga nahitabo sa Sitio Balaw, Barangay Sudlon 2, Cebu City, niadtong Oktobre 25, 2025.
Kini ang gipahayag ni Cebu City Councilor Dave Tumulak atol sa pakighinabi sa Bombo Newsteam Cebu, human nga adunay kaugalingong pamahayag ang giilang suspetsado nga si Leonardo “Jun” Manto Jr.
Matud pa sa konsehal, kinahanglan nga palagman ug lalumon pag-ayo ang imbestigasyon aron masuta ang tinuod nga motibo ug mga kalambigitan sa maong krimen.
Una niini, ni-surrender kang Konsehal Tumulak ang ig-agaw ni Manto nga giilang si alias John, nga giingong usa sa mga suspek.
Personal kini nga mitunol sa mga otoridad niadtong Martes, Oktobre 28, 2025, human mangayo og tabang ang pamilya niini pinaagi sa ilang Barangay Kapitan.
Giingong mitago kini sa Samboan human sa insidente tungod sa kahadlok, apan pinaagi sa pagpangumbinse sa konsehal, iyang asawa, ug sa kapitan sa barangay, nakumbinsi kini nga mosurender aron tubagon ang mga akusasyon batok kaniya.
Samtang, mi-surrender usab si Leonardo “Jun” Manto Jr. sa kapulisan sa Pasig City niadtong Miyerkules sa gabii, Oktobre 29, 2025.
Matud pa niini, nagpili siya nga didto mosurender tungod sa kahadlok sa iyang seguridad, ilabi na kay kabaro sa kapulisan ang biktima.
Sa pagkakaron, padayon ang malalum nga imbestigasyon aron masuta kung adunay mas lawom nga hinungdan o kalambigitan sa pagpusil-patay kang Captain Deiparine.
