Gisugdan na sa Kagamhanang Dakbayan sa Sugbo ang pagtiwas sa konstruskyon sa Cebu City Medical Center (CCMC) atol sa ceremonial groundbreaking niini niadtong Miyerkules, Pebrero 11, 2026.
Nahitabo ang seremonyas sa ikalimang andana sa tambalanan nga gitamboangan sa mga opisyal sa syudad, administrator sa ospital, representante sa kontraktor nga Dakay Construction and Development Corporation ug uban pa nga gipangulohan ni Cebu City Mayor Nestor Archival Sr.
Sa iyang mensahe, nipadayag ang mayor nga ang proyekto sa CCMC kay pipila ka tuig nang napuno sa kontrobersiya, kalangay, ug pagsaway apan karon kay ila gitutokan ang review ug accountability measures aron mapanalipdan ang pundo nga dili mabinuangan.
Dugang pa sa mayor nga katuyuan sab sa iyang administrasyon nga matapos ang maong tambalanan isip pagtuman sa iyang pasaad niadtong panahon sa pagpangampanya sa tinguha nga mapalambo ng serbisyong panglawas sa dakbayan.
Ang konstruksyon kay magpuno og laing tulo ka andama sa maong building nga gilangkoban sa ika-upat, lima, ug unom nga lebel sa edipisyo. Target nga matapos kini sa Disyembre 2026 ug gilaumang ma-operational sa Enero 2027.
