CEBU CITY-Mokabat sa P700 milyones nga savings ang anaa para sa pagpadayon sa pagtukod sa Cebu City Medical Center (CCMC).
Sa usa ka pamahayag, si Cebu City Councilor Jerry Guardo, kinsa maoy chairman sa komitiba sa imprastraktura, niingon nga ang magamit nga pundo gikan sa P1-bilyon, nga gihatag ngadto sa kontraktor nga M.E Sicat Construction.
Ang maong kontrata, bisan pa, gitapos sa 2022 tungod sa mga paglangan. Tungod niini, ang nahabilin nga kantidad gideklarar nga savings sa City Government.
Matod ni Guardo nga ang P1 bilyon nga kontrata gipirmahan sa panahon ni anhing mayor Edgardo Labella.
Dugang niya nga ang engineering department sa dakbayan nangandam na sa Program of Work and Estimate (POWE) aron ma-bid out na usab ang proyekto.
Iduso sa POWE unya ngadto kang Acting Mayor Raymond Alvin Garcia alang sa pagsusi.
Matod sa konsehal nga nanghinaot siya nga ma-bid out ang proyekto sa kataposang semana sa Hulyo o unang semana sa Agosto.
Matod niya nga sa magamit nga savings, mahuman na sa dakbayan ang ikatulong andana hangtod na ang bahin sa ikapitong andana.
Sa pagkakaron, ang mga pasyente naglisud sa pag-access sa lainlaing lebel sa bilding tungod sa kakulang sa mga elevator, ingon niya.
Mipadayag usa bsi Cebu City Acting Mayor Raymond Alvin Garcia niadtong Biyernes, Hunyo 21, nga magmugna siya og task force nga maoy modumala sa pagkompleto sa CCMC sulod sa unom ka buwan.
Mipahayag si Garcia nga mopirma siya og memorandum nga magmugna sa Task Force CCMC sunod semana.
Dugang pa sa alkalde nga ang task force maoy modumala ug momonitor sa katukoran sa 10 ka andana nga tambalanan sa dakbayan.
