CEBU CITY- Mahimong mosangpot sa delikadong sitwasyon alang sa mga mamamahayag ang mga pamahayag ni Senador Rodante Marcoleta nga nag-akusar nga adunay mga “bayaran” sa media, ilabi na kung walay klarong ebidensya nga gipresentar aron suportahan kini.
Kini ang gipahayag ni Presidential Task Force on Media Security (PTFoMS) Executive Director Usec. Jose Torres Jr. sa usa ka pakighinabi sa Bombo News team.
Matud ni Torres, usa ka dakong insulto sa tibuok industriya ang maong pamahayag ug mahimong makahatag og sayop nga impresyon sa publiko batok sa mga peryodista nga matinud-anon nga nagtuman sa ilang katungdanan.
Bisan pa man nga nangayo na og pasaylo si Marcoleta ug niklaro nga wala niya gihulagway ang tibuok media, nagtuo si Torres nga dili pa kini igo ug nanginahanglan pa og mas lalom nga pagpasabot.
Gipahinumduman usab sa opisyal ang mga mamamahayag, nga aduna silay katungod nga mobarog ug mopasaka og pormal nga reklamo kon bation nila nga naapektuhan o nahulga ang ilang propesyon, diin mamahimo silang mangayo og tabang direkta sa PTFoMS.
Sa pikas bahin, gitubag usab ni Torres ang bag-ohay lang nga komentaryo ni Senador Alan Peter Cayetano kalabot sa pamaagi sa media sa pagpili og mga headlines ug anggulo sa coverage.
Gipasiugda sa head sa PTFoMS nga dili mamahimong diktahan sa mga politiko ug mga opisyal sa gobyerno ang editorial decisions sa usa ka news organization.
Matud niya, ang media adunay kaugalingong mga sukdanan ug etika sa pagtimbang-timbang kon unsa nga mga balita ang newsworthy ug importante alang sa interes sa publiko.
Taliwala sa nagkainit nga political sa nasod, nanawagan si Torres sa tanang mga mamamahayag nga magpabiling patas, responsable, ug lig-on sa pagpatigbabaw sa mga prinsipyo sa seryoso ug etikal nga journalism.
