Pormal nga giabli ang PALAWAN: World’s best Island Travel and Trade Expo 2026 sa Ayala Center Cebu, kagahapong adlawa, Biyernes, Oktubre 23, 2026
Ang tulo ka adlaw nga travel ug trade expo gitambongan sa mga tourism enterprise, travel operator, business representatives, corporate buyers ug mga potensyal nga investors ug magpadayon kini hangtod Oktubre 25.
Tumong sa maong kalihukan nga mapalig-on ang kooperasyon tali sa Palawan ug mga destinasyon sa Visayas, ilabi na sa Sugbo, pinaagi sa tourism partnerships ug mga kasabutan sa negosyo.
Ang tema sa expo mao ang *“Beyond Paradise: Connecting Islands, Creating Opportunities.”*
Kini usab ang unang higayon sulod sa 11 ka tuig nga gidala sa Palawan ang ilang flagship travel ug trade event gawas sa Metro Manila, nga giorganisar sa Provincial Government sa Palawan, kauban ang Palawan Tourism Council o PTC.
Sumala ni PTC President Rey Felix “Rix” Rafols, dili lang kutob sa pagpromote sa mga beaches ug natural attractions sa Palawan ang ilang tumong, gipasiugda usab niya ang importansya sa pagtinabangay sa nagkadaiyang destinasyon aron mas molig-on ang tourism industry sa Pilipinas.
Matud pa ni Rafols, kinahanglan nga ang turismo dili lamang alang sa mga langyaw o mga bisita, kundili kinahanglan usab nga makahatag og kaayohan sa mga Palaweño.
Gilauman nga pinaagi sa expo, makapangita og bag-ong business partners ang mga hotel, resort, tour operator ug transport provider sa Palawan gikan sa Sugbo ug sa ubang bahin sa Visayas.
Gipili ang Sugbo, isip venue sa expo tungod sa lig-on na niini nga tourism industry, halapad nga domestic travel market ug maayong air connections padulong sa mga importanteng destinasyon sa Palawan.
Lakip sa mitambong sila Cebu Governor Pamela Baricuatro, Lapu-Lapu City Mayor Cynthia King-Chan ug Mandaue City Mayor Thadeo Jovito “Jonkie” Ouano.
