CEBU CITY-Gisayangan ug naguol ang pamilya ni Filipino weightlifter John Ceniza sa dihang napakyas kini sa paglangkat og medalya sa men’s 61kg weightlifting division sa 2024 Paris Olympics.
Diin katulo ka higayon nga misuway sa 125kgs sa snatch apan naputol kini tungod sa iyang kapakyasan ug wala na siya makapadayon sa maong torneyo.
Sa pakighinabi sa Bombo Radyo Cebu kang Ludy Ceniza, ang inahan ni John Ceniza emosyonal kini nga mipaambit sa iyang reaksyon sa duwa sa iyang anak niini mapasigarbuhon gihapon ug malipayon kini nga bisan napildi, dili kini mahimong babag sa pangandoy kondili gamiton hinuon kini nga leksyon ug inspirasyon aron makabangon sa sunod nga mga kompetisyon.
Subo usab nga gibutyag sa iyang inahan nga adunay gipamati nga injury sa iyang kilid si John Ceniza ug posibleng mao kini ang hinungdan sa dili maayo nga resulta sa duwa.
Apan nagpasalamat gihapon kini sa mga misuporta kaniya ug nangayo og pasaylo sa mga naglaum nga makalangkat kini og medalya.
