Gikuwestiyon ni Davao City 1st District Representative Paolo Duterte ang desisyon sa Senado, nga naglihok isip impeachment court, kabahin sa gidaghanon sa mga boto nga gikinahanglan alang sa pagkondena sa impeachment trial.
Matod ni Duterte, ang usa ka interpretasyon dili awtomatikong mahimong uyon sa Konstitusyon tungod lang kay gisuportahan kini sa mayoriya.
Gipasiugda niya nga ang Konstitusyon klaro nga nagtakda nga gikinahanglan ang pag-uyon sa 2/3 sa tanang miyembro sa Senado alang sa pagkondena.
Nagkanayon siya nga kung adunay panagbangi bahin sa interpretasyon sa usa ka probisyon sa Konstitusyon, ang Korte Suprema ang angay modesisyon kung nahiuyon ba kini sa batakang balaod sa nasod.
Gipasiugda usab ni Duterte nga ang mga posisyon sa gobyerno temporaryo lamang, samtang ang Konstitusyon nagpabilin nga kinatas-ang balaod sa nasod.
Samtang, gipadayag niya ang iyang pagsupak sa bisan unsang lakang nga mag-usab sa gikinahanglan nga probisyon sa Konstitusyon base lamang sa kasamtangang gidaghanon sa mga boto sa Senado.
