CEBU CITY-Patay ang duha samtang lain pang tulo ang nalanding sa tambalanan human nga gidasmagan sa usa ka naghaguros nga pribadong sakyanan sa dalan C. Padilla, Barangay San Nicolas Proper, dakbayan sa Sugbo.
Giila ang mga namatay nga sila si Rodrigo Abapo, Jr., residente sa Panas, Barangay Marigondon, dakbayan sa Lapu-Lapu ug si Ronnie Taneo, 32-anyos, usa ka professional teacher ug taga lungsod sa Cordova.
Samtang ang mga nagpabilin karun sa tambalanan kay sila si Carlito Balobo Entoma, 29 anyos ug ang backrider niini nga si Shiela Mae Gabito Capul, 19-anyos ug pulos taga Barangay Labangon, dakbayan sa Sugbo.
Ang suspect driver kay giila usab nga si Christian Joshua Abrasaldo, 22-anyos, taga Barangay Tungkil, lungsod sa Minglanilla, ug lumad nga taga Negros Oriental.
Gisaysay ni Police Chief Master Sergeant Diosdado Parejas, ang imbestigador sa Sawang Calero Police Station, nga unang nadasmagan sa suspect driver ang pedestrian nga si Jelon Ababon, 55-anyos, apan inay nga muhunong, misutoy kini sa pagdagan gumikan sa iyahang kahadlok, diin miresulta sa bangga sa naasoy nga laing upat ka mga biktima nga miresulta sa kamatayon sa duha.
Sa imbestigasyon, giingong gikan ug birthday party ang suspek hinungdan nga ubos kini sa impluwensya sa ilimnong makahubog.
Kasong reckless imprudence resulting to double homicide, damage to property with multiple physical injuries, ang atubangon sa naasoy nga sa suspect driver.
