CENTRAL VISAYAS- Nagpabiling lig-on ang kuta sa Bise Presidente sa rehiyon sa Visayas, tungod kay adunay tulo ka mga magbabalaod gikan sa Sugbo, duha sa Bohol, ug usa ka partylist representative ang opisyal nga mipadangat sa ilang boto nga “NO” batok sa impeachment complaint ni VP Sara Duterte.
Subay sa opisyal nga tally sa Kamara, niguwa ang mga ngalan nila ni Cebu City North District Rep. Rachel “Cutie” Del Mar, Cebu 3rd District Rep. Karen Hope Garcia, ug Cebu 4th District Rep. Sun Shimura nga mibabag sa maong lakang.
Sa bahin ni Del Mar, iyang gipasabot nga ang iyang baruganan nag-ugat sa sentimento sa iyang mga konstituwente sa North District, samtang gihulagway ni Garcia ang proseso sa impeachment nga usa ka “sui generis” o kombinasyon sa legal ug politikal nga kinaiya nga iyang gisalikway.
Nidugang sa listahan si Congresswoman Girlie Veloso sa Malasakit at Bayanihan Partylist kinsa mipasiugda nga serbisyo publiko ug dinaliang kabalaka sa katawhan ang angay tutokan sa gobyerno karon.
Subay niini, eksklusibong gikuha sa Bombo Radyo Cebu news team ang habig ni Veloso aron masuta kung unsa ang nagpaluyong rason sa iyang pagbabag.
Matod ni Veloso, ang pagtubag sa YES or NO, “decided” na niya daan sukad pa sa 20th congress, ug matod niya, kini naggumikan sa rason nga adunay 32.2 million nga mga botar nga naani sa bise presidente.
Busa alang kang Veloso, kana palang daan, angayan lang nga tugyanan kini og respeto.
Dugang pamahayag ni Velaso, tungod sa krisis nga nasinati sa kasamtangan, alang kaniya, mao kini ang angayan hatagan og igong pagtagad, kaysa sa impeachment case sa bise presidente.
Ingun man nga gihimug-atan niini nga ang impeachment usa ka politikal nga kalihokan, ug matod niya, aduna pay mas bug-at nga tulubagon ang ubang politiko, kompara sa tulubagon ni VP Duterte.
