Nakaplagan sa mga lumulupyo dapit sa Kinalumsan bridge, dalan C. Padilla, Barangay Mambaling ning dakbayan sa Sugbo ang giingong patayng lawas sa puya (fetus) pasado alas 11 sa buntag niadtong Dominggo, Pebrero 15, 2026.
Sumala pa sa saksi nga si Robert “Digay” Bacus sa pakighinabi niini sa Bombo Radyo Cebu News Team nga nakatabi pa niya ang lalaking milabay og plastic bag sa maong dapit sa dihang nangutana kini kung mamahimo ra bang mudam-ok og basura kaniadto pang Biyernes sa gabii, Pebrero 13.
Nabantayan ni Bacus nga sa wala pa niya gilili ang maong gidudahang plastic bag kay adunay laing kaubot ang midapit kaniya diin mutulo lang og kalit iyang luha hinungdan nga sa pagpangaykay niini aron mangalakal para ipatimbang sa junk shop pag-Dominggo sa buntag kay didto na niya nakita ang makalolouy nga puya nga putos og panapton sulod sa plastic bag.
Daling nangayo og tabang ug atensyon si Bacus sa kapulisan ug mga kawani sa barangay aron asikasohon ang nahitabo sa patay nga puya.
Samtang sa habig sa mga awtoridad kay padayon ilang pakigsusi sa pag-ila sa gitumbok nga milabay sa maong plastic bag diin gikatahong sakay daw kini sa e-bike sa pagsibat padulong sa Sawang Calero niadtong Biyernes sa gabii.
