-- ADVERTISEMENT --

Gipadayag ni Atty. Rameses Victorious Gatchalian Villagonzalo, usa ka International Criminal Court (ICC) accredited lawyer, ang iyang panan-aw kabahin sa giplanong pagtukod sa “Pax Silica,” usa ka dako nga AI data center nga gipangunahan sa Estados Unidos dinhi sa nasud.

Matod ni Atty. Villagonzalo, ang Pax Silica sama sa usa ka gipalambo nga bersyon sa mga data center ug call center nga gitingob, diin hiposon ang nagkadaiyang impormasyon alang sa publiko. Bisan og aduna kini dakong benepisyo sa ekonomiya—sama sa paghatag og dugang trabaho sa mga lokal ug paglambo sa mga negosyo sama sa catering ug food supply—aduna gihapon kini mga seryosong isyu nga angay tan-awon.

Una niini mao ang epekto sa kalikopan o environmental implication. Gipasabot sa abogado nga ang maong pasilidad nagkinahanglan og lapad kaayo nga yuta nga mora na og usa ka siyudad, hinungdan nga posibleng maapektuhan ang mga farmlands o umahan. Dugang pa, kusog usab kini mokaon og kuryente ug tubig aron lang mabugnawan ang mga ekipo ug gadgets niini.

Ikaduha, gihisgutan usab ni Atty. Villagonzalo ang pamaagi sa negosasyon nga government-to-government, bisan pa man og pribado ang kinaiya sa maong negosyo. Sumala niya, gituyo kini aron malikayan ang red tape ug kurapsyon kon mag-apply og mga permit sa lokal nga lebel.

Apan ang labing gibantayan sa abogado mao ang isyu sa hurisdiksyon ug soberanya. Diin nakadungog siya og mga taho nga posibleng balaod sa Amerika ang mopatigbabaw sulod sa Pax Silica.

-- ADVERTISEMENT --

Matud pa niini nga daw sama gihapon kini og military bases nga adunay immunity. Giklaro usab ni Atty. Villagonzalo nga kon ang entero pasilidad ipaubos sa hurisdiksyon sa US, dili na basta-basta makasulod ang Philippine National Police (PNP) ug National Bureau of Investigation (NBI) kon adunay mahitabong krimen sa sulod niini.

Busa, alang kang Atty. Villagonzalo, mas maayo kon balaod sa Pilipinas ug ang atong Labor Code ang ipatuman, ug magpabilin sa mga Pilipino ang pagpanag-iya sa yuta samtang teknolohiya lang ang sa US pinaagi sa usa ka joint venture.