Nagkanayon si Cebu City Mayor Nestor Archival nga abli siya ug gidawat ang pagtukod og susamang ekosistema sa Artificial Intelligence (AI) sa rehiyon, human n sa pasalig sa Pilipinas sa inisyatibo sa Pax Silica nga gipangulohan sa U.S.
Sumala niya, ang siyudad nagpadayon sa pagpalambo sa kahibalo ug kapabilidad sa mga empleyado niini sa AI isip kabahin sa pasalig sa iyang administrasyon sa pagtukod og mas maalamon nga siyudad.
Busa, iyahang gikumpirmar nga nakigtigom na ang Dakbayan sa Sugbo sa Department of Science and Technology (DOST) ug nagsubay sa usa ka Memorandum of Agreement (MOA) aron mahatagan og dakong pokus ang pagpalambo sa AI ecosystem sa syudad.
Dungan niini, gibutyag usab sa mayor nga adunay gibasehang kapin sa 30 ka indibidwal nga nakadawat og financial assistance alang sa pagbansay sa AI pinaagi sa usa ka kompanya nga accredited sa TESDA ug DOST.
Gitugotan ug gidasig usab niya ang mga kawani sa Mayor’s Office nga moatender ug mga seminar bahin sa AI aron ma-upgrade ang ilang kaalaman ug kahanas sa teknolohiya, tungod kay nagtuo siya nga ang AI ang atong kabag-ohan ug umaabot.
Samtang, giklaro usab niya nga wala nagpasabot nga nagsuporta ang iyang administrasyon sa Pax Silica project taliwala sa mga nigawas nga mga balita ug posts sa social media.
Sa usa ka pahayag nga gipagawas niya, iyahang gipasabot nga ang iyang nahimong pahayag sa nakalabay nga press conference niadtong Agosto 3 bahin lamang sa pag-andam sa dakbayan ug sa mga Sugboanon alang sa natad sa Artificial Intelligence (AI) pinaagi sa edukasyon, digital skills, ug inobasyon.
Giinsister usab sa mayor nga ang pagsuporta sa pagpangandam sa AI ug bag-ong teknolohiya dili kinahanglang sabton isip opisyal nga pag-endorso sa Pax Silica project. Matud pa niya, isip mayor sa Sugbo, wala pa siya’y gipagawas nga opisyal nga deklarasyon nga nagsuporta sa maong proyekto.
