Misapublikar si Presidente Ferdinand “Bongbong” Marcos Jr. sa iyang bahandi nga adunay kinatibuk-ang balur sa P389-milyones.
Kini gibase sa iyang Statement of Assets, Liabilities, and Net Worth sa Disyembre 31, 2024.
Apil usab sa iyang SALN ang usa ka appraisal sa usa ka pribadong kompanya, ang Cuervo Appraiser Inc., nga nagbutang sa iyang net worth nga P1.375 bilyon.
Kini nagpasabot nga ang P389.57-milyones kay gibase sa mga giya sa pag-file sa SALN sa Civil Service Commission samtang ang P1.375-bilyones gibase sa kantidad gikan sa appraisal sa Cuervo company.
Ang iyang mga asset naglakip sa P142.026-milyones nga kantidad sa 21 ka real estate properties lakip ang agricultural ug residential land ug personal nga mga property nga nagkantidad og P247.332-milyones.
Ang uban sa personal nga mga asset ni Marcos Jr. naglakip sa cash nga P38.7-milyones ug mga investment nga P134.192-milyones ingon man mga alahas, 12 ka mga sakyanan ug mga painting nga nagkantidad og P247.332-milyones.
Ang uban sa iyang mga sakyanan mao ang usa ka Mercedez-Benz Maybach nga nagkantidad og P10.5-milyones ug 126 ka mga painting gikan sa mga sikat nga artista, diin ang pinakamahal niini kay tag P19-milyones.
Wala gideklarar sa presidente ang bisan unsang mga utang gikan sa iyang 2024 SALN ingon man sa iyang mga SALN gikan niadtong Hunyo 2022.
