Gipasidunggan ni Pres. Ferdinand Marcos Jr. ang mga Pilipinong mamumuo atol sa Labor Day, samtang giila ang ilang kalig-on ug abilidad sa pagpahiangay taliwala sa paspas nga kausaban sa teknolohiya ug nag-usab nga industriya.
Sa iyang mensahe karong Biyernes, gihulagway sa Presidente ang mga mamumuo isip “backbone of the Republic,” tungod sa ilang dakong papel sa pagpalambo sa ekonomiya sa Pilipinas ug sa kalibutan.
Giingon ni Marcos nga bisan pa sa pag-uswag sa teknolohiya ug pagbag-o sa industriya, nagpabilin nga ang Pilipinong mamumuo ang nagpadagan sa nasud ug nagpalihok sa global nga ekonomiya.
Giila usab niya ang padayon nga pagpahiangay ug pakigkompetensya sa mga trabahante taliwala sa mga hagit sama sa automation ug nag-usab-usab nga panginahanglan sa ekonomiya.
Ang iyang pahayag migawas samtang ang mga labor group nagsaulog sa Labor Day ug nagpasiugda sa dugay nang isyu sama sa ubos nga suweldo, contractualization, ug job insecurity.
Gipasalig usab sa Presidente ang pagpalapad sa oportunidad sa trabaho ug pagpalig-on sa proteksyon sa mga mamumuo, uban sa tumong nga mapanalipdan ang dignidad sa matag trabahante ug matukod ang mas patas nga “Bagong Pilipinas.”
