Nipahigayon si President Ferdinand Marcos Jr. og surpresang inspeksyon sa nagpadayong rehabilitasyon sa Navotas Fish Port Complex (NFPC), nga giisip nga labing dakong fish trading hub sa nasod, niadtong Sabado, Hulyo 11, 2026.
Matud sa Presidente, ang modernisasyon sa maong pasilidad makatabang sa pagpalambo sa panginabuhian sa mga mangingisda ug sa pagseguro sa lig-on nga suplay sa pagkaon alang sa mga Pilipino.
Gipaambit ni Marcos ang mga hulagway ug video sa inspeksyon, diin mikuyog kaniya si Agriculture Secretary Francisco Tiu Laurel Jr.
Giingon ni Marcos nga personal niyang gisusi ang rehabilitasyon sa 49-ektaryang complex aron maseguro nga ang imprastraktura makatubag sa nagkadakong panginahanglan sa sektor sa pangisda.
Samtang, giingon sa Philippine Fisheries Development Authority (PFDA) nga ang ikatulong hugna sa NFPC Modernization Program naglakip sa rehabilitasyon sa Market Halls 1 ug 2, nga kabahin sa ₱1.6 bilyones nga infrastructure program nga giaprobahan niadtong Hunyo aron mapalambo ang mga pasilidad sa pangisda sa tibuok nasod.
Gilauman nga mahuman ang maong proyekto sa Disyembre 2026.
