Giandam na sa Philippine Crop Insurance Corp. (PCIC) ang kapin P36 milyon nga insurance payouts alang sa 5,005 ka mag-uuma kansang mga pananom nadaot sa Bagyong Luis ug Maymay, ingon man sa Southwest Monsoon o Habagat, gikan Agosto 1 hangtod 11, 2026.
Sumala sa Department of Agriculture (DA), ang inisyal nga banabana sa insured damages sa unom ka rehiyon mikabat sa P35.67 milyon.
Ang pinakadaghan nga mga apektadong mag-uuma natala sa Region III o Central Luzon nga adunay 1,836, gisundan sa Region I nga adunay 1,218 ug Region IV-B nga adunay 836.
Ang pinakadako nga insured losses natala sa palay nga mikabat sa P25.60 milyon.
Gisundan kini sa high-value crops nga adunay P3.73 milyon ug mais nga adunay P3.55 milyon.
Miingon ang DA nga gipalihok sa PCIC ang mga regional office niini alang sa damage validation ug pagpadali sa pagproseso sa insurance claims.
Sumala ni Agriculture Secretary Francisco Tiu Laurel Jr., importante ang dali nga paghatag og tabang sa mga mag-uuma ug mangingisda human sa matag kalamidad aron matabangan silang makabangon ug makabalik dayon sa ilang panginabuhian.
Samtang, miingon si PCIC President Jovy Bernabe nga naggamit usab ang ahensya og bag-ong teknolohiya aron mapadali ang pagtimbang-timbang sa kadaot ug pagpagawas sa insurance assistance.
Gipasiugda sa PCIC nga ang inisyal nga mga numero mahimong mausab samtang nagpadayon ang field validation sa kadaot.
