Nangandam na ang Department of Agriculture (DA) sa posibleng epekto sa El Niño phenomenon nga gilaumang magdala og grabeng kainit ug hulaw sa nasod sa umaabot nga mga bulan.
Sumala ni Agriculture Secretary Francisco Tiu Laurel Jr., gipakusgan na nila ang mga pasilidad sa irigasyon ug gipalapdan ang mga cold storage aron matipigan ang mga pananom, makunhuran ang post-harvest losses, ug malikayan ang pagsalig sa mga imported nga produkto.
Gawas niini, nangandam na sab ang gobyerno sa paghatag og pinansyal nga tabang alang sa mga maapektuhang mag-uuma.
Kahinumduman nga nagpagawas og El Niño Alert ang DA base sa datus sa PAGASA, diin adunay 79% nga tsansa nga masinati ang maong hulaw sugod karong Hunyo ug Agosto 2026, nga posibleng molungtad pa hangtod sa sayong bahin sa 2027.
Tungod sa hulga sa kakuwang sa suplay sa pagkaon ug posibleng pagsaka sa presyo sa merkado, nanawagan ang DA sa publiko nga magdaginot sa paggamit sa tubig samtang wala pa mograbe ang epekto sa El Niño.
