Gipahibalo ni President Ferdinand R. Marcos Jr. nga andam siyang mohatag sa iyang Statement of Assets, Liabilities, and Net Worth (SALN) sa bisan unsang lehitimong ahensya nga mohangyo niini, sama sa Office of the Ombudsman ug Independent Commission for Infrastructure (ICI) nga kasamtangang nagsusi sa mga kahiwian sa mga flood control project.
Matod sa Presidente, nasurprisa siya nga halos dili na makuha ang SALN sa mga opisyal ubos sa miaging administrasyon.
Gidugang niini, nga kung mangayo ang Ombudsman o ICI sa iyang SALN, iya dayon kining ihatag.
Kung kahinumduman, si Ombudsman Jesus Crispin Remulla bag-o lang nagtangtang sa mga pagdili sa publiko nga maka-access sa SALN isip kabahin sa pagpalig-on sa transparency sa gobyerno.
Nagtuo ang Presidente nga angayan lang nga ablihan ang SALN sa mga opisyal sa gobyerno aron malikayan ang bisan unsang pagduda.
Nikusog ang panawagan sa pagbutyag sa SALN sa mga opisyal sa gobyerno nunot sa imbestigasyon sa mga kontrobersyal nga flood control projects.
