Gimandoan ni Presidente Ferdinand Marcos Jr., ang Department of Budget and Management (DBM) nga ibalik ang gikuha nga P400 milyones nga branding budget sa Department of Tourism.
Sa tigum sa Malacañang uban ni Tourism Secretary Cristina Frasco, si Presidente Marcos miingon nga ang momentum sa DOT sa pagpasiugda sa international image sa nasud dili angay nga usikan, ilabi na nga ang Pilipinas maoy nahimong sentro sa atensyon tungod sa bag-o nga mga kalampusan sa pipila ka mga Pilipino.
Apil na niini ang duha ka bulawang medalya ni Carlos Yulo gikan sa Paris Olympics ug ang kadaugan ni Sofronio Vasquez sa usa ka prestihiyosong talent search show.
Gihisgutan usab sa Presidente ang dili malimtan nga dedikasyon sa mga Filipino health workers sa tibuok kalibutan sa panahon sa pandemya, nga kabahin sa pagpakaylap sa maayong imahe sa Pilipinas.
Matod ni Presidente Marcos, ang pundo kuhaon gikan sa contingency fund sa Office of the President.
Ingon man nga giuyonan ug mipaabot sa iyang hingpit nga suporta si DOT Secretary Christina Frasco sa pamahayag sa Presidente.
Sa iyang presentasyon, si Frasco miingon nga ang kakuwang sa pondo sa DOT mahimong mosangpot sa pagkunhod sa pakiglambigit sa mga target audience, mas gamay nga mga oportunidad alang sa pamatigayon ug pagpaaktibo sa mga konsumidor, ug kakuwang sa global nga mga placement sa media.
