Gipasalamatan ni Presidente Ferdinand Marcos Jr. ang tanang mga Pilipino nga mibotar sa eleksyon.
Sa giluwatang pamahayag sa Presidente, iyang gipasiugda nga ang nasud nagpakita na usab sa diwa sa demokrasya, pinaagi sa malinawon, hapsay, ug ligdong nga piniliay.
Dugang sa presidente nga kini usa ka selebrasyon sa pagpadayon ug usa ka panawagan sa gobyerno nga molihok alang sa tinuod nga mga hagit nga giatubang sa mga Pilipino.
Masaligon si PBBM nga ang mga piniling opisyal maminaw sa mga mulo sa katawhan, motubag niini ug molihok sa mga hagit sa inflation, trabaho, korapsyon, ug inadlaw nga palas-anon sa katawhan.
Gipadayag usab sa Presidente ang iyang dakong pasalamat sa mga tawo nga mibotar ug misuporta sa mga kandidato sa administrasyon.
Nagkanayon usab kini bisan og dili tanan sa 12 ka mga kandidato pagka-senador ang nabutang sa magic 12 kay magpadayon gihapon ang ilang misyon ug trabaho.
Gihatagan og gibug-aton sa Presidente ngadto sa mga dili palaran nga nakadaog, iyang gitahod ang ilang kaisog ug pasalig sa serbisyo publiko.
Ang panawagan sa Presidente karon nga nahuman na ang eleksiyon mao ang pagpadayon sa pag-uswag, dili sa paglingi sa nangagi kondili sa umaabot.
Gipahibalo usab sa Presidente ang iyang pakiglamano sa bag-ong napili nga mga kandidato ug nag-awhag kanila sa paghiusa uban ang bukas nga hunahuna ngadto sa common mission sa saktong pagdumala sa gobyerno ngadto sa mas hapsay ug produktibo nga nasud.
