CENTRAL VISAYAS- Naglunsad og mga komprehensibo nga safety ug transport measures, ang mga ahensya sa gobyerno sa Central Visayas aron masiguro nga luwas ang pagbiyahe sa tibuok rehiyon ilabi na nga gipaabot ang pagdaghan sa mga biyahedor karung umaabot nga Semana Santa 2025.
Sa pakighinabi sa Bombo Newsteam kang Lieutenant Junior Grade Abel Jan V. Lomboy ang tigpamaba sa Coast Guard District Central Visayas, gitino niini nga ipaubos sa heightened alert ang Philippine Coast Guard District (PCG) 7 gikan Abril 13 hangtod Domingo, Abril 20.
Gipasiugda usab ni LTJG Lomboy ang mga proactive nga mga lakang, lakip ang pagpaaktibo sa “Malasakit Help Desks” sa mga sea terminals aron matubag ang mga kabalaka sa mga pasahero.
Ingon man ang pagdeploy sa “Quick Response Teams” alang sa mga emerhensya, ug ang paggamit sa K9 units sa pag-inspeksyon sa mga barko alang sa mga ilegal nga substansiya ug mga eksplosibo.
Gidugang niini nga ang mga pre-departure inspection pagahingusgan usab aron masiguro ang seaworthiness sa tanang molarga nga mga barko.
Nipahimangno usab kini sa mga byahedor nga likayan ang pagdala og mga butang sama sa explosive, sharp materials ug flammable materials, kana gumikan kay wala kini gitugutan og dako ang posiblidad nga ma-hold sila.
