Gipagawas sa Philippine Coast Guard ang mga litrato sa mga tripulante sa China nga nanguha og mga giant clam ug uban pang marine species sa Bajo de Masinloc shoal.
Matod sa tigpamaba sa PCG sa West Philippine Sea Commo. Jay Tarriela, ang tuyo sa pagpublikar sa maong mga hulagway mao ang pagpakita nga ang China kanunay nga naghimo niining matang sa ilegal nga kalihokan sa teritoryo ilalom sa kadagatan.
Asoy niya nga kabahin kini sa transparency strategy sa Pilipinas aron mahibaw-an sa mga kritiko nga wala mograbe ang tensyon sa West Philippine Sea tungod kay kini nga mga aktibidad sa China nahimo na kaniadto apan wala gipahibalo sa publiko.
Gani, kinahanglang sabton sa mga katawhan nga kining mga agresibong aksyon sa China sa WPS wala lang nagsugod sa panahon sa administrasyon ni Presidente Ferdinand Marcos Jr.
Sa datus sa PCG, ang mga hulagway kuha niadtong 2017 hangtud 2019 ug gisumiter kini ngadto sa Office of the President ug ubang ahensya sa gobyerno sa administrasyon ni kanhi Presidente Rodrigo Duterte, apan si Tarriela niingon nga wala siya masayod kon aduna bay tubag ang gobyerno kaniadto kay matud niya dili pa siya ang naglingkod nga tigpamaba sa PCG alang sa hisgutanan sa WPS.
