CENTRAL VISAYAS-Human nahipos na ang schedule sa filing sa sertipeku de kandidatura sa Commission on Elections (COMELEC), ang Philippine Drug Enforcement Agency in Central Visayas (PDEA-7) mi-anunsyo sa ilang plano sa pag-monitor sa mga aspiring candidates sa mga posibling kalambigitan sa mga aktibidad sa ginadiling drogas o sa mga personalidad niini.
Kini ang gipamahayag ni Leia Alcantara, ang tigpamaba sa PDEA-7 diin mipahayag siya nga ang mga sindikato sa ilegal nga drugas mahimong makig-alyansa ug mosuporta sa mga politiko aron mapadali ang ilang operasyon.
Apan sa kasamtangan walay mga gikataho nga mga aspiring candidates nga nalabigit sa maong illegal nga drugas apan vigilant lang gihapon sila ilabi na nga anaa pa kita sa sayo nga bahin sa panahon sa pagpangampanya.
Gipasabot sa opisyal nga ang mga sindikato sa drugas mahimong makaimpluwensya sa mga politiko mahimong direktang tigpundo o isip third-party sponsors.
Gihulagway ni Alcantara nga anaay duha ka mga senaryo sa maong higayon sama sa kung ang maong politiko adunay kasayuran sa pagpundo sa mga sindikato ug gidawat kini o di ba kaha walay kasayuran ang maong politiko kay nag-agi og mga internediaries ang kwarta.
Iyang giklasipikar ang mga kandidato nga nalambigit sa ilegal nga drugas kay giisip high-value target (HVT) tungod sa ilang potensyal nga papel sa pagpadayon sa pagbaligya sa droga.
