Gidakop ang usa ka lalaki nga nagpakaaron-ingnon nga deputized agent sa Land Transportation Office (LTO) human kini misulay sa paglikay sa iyang kalapasan sa trapiko pinaagi sa pagpanghadlok sa mga enforcer niadtong Marso 20, 2026.
Nahitabo ang insidente sa N. Bacalso Avenue dihang gipara sa mga personahe sa Cebu City Transportation Office (CCTO) ang usa ka pribadong sakyanan nga ilegal nga nisulod sa linya sa Bus Rapid Transit (BRT).
Imbis nga mokooperar, usa ka pasahero nga nagsul-ob og “GONZCAF Security ID” ang nimando sa drayber nga dili ihatag ang lisensya ug nangangkon nga siya usa ka deputized agent sa LTO.
Gikuhaan pa niini og hulagway ang mga enforcer dungan sa hulga nga iyang i-report ang mga opisyal ngadto sa ahensya.
Apan human sa gihimong beripikasyon ni LTO 7 Regional Director Atty. Wendel Dinglasan, nasuta nga ang maong indibidwal walay bisan unsang deputation o awtoridad gikan sa ilang buhatan.
Tungod niini, gitun-an na karon ni RD Dinglasan ang pagpasaka og kasong kriminal batok sa maong tawo tungod sa pagpakaaron-ingnon isip opisyal sa kagamhanan.
Subay niini, subling nipahimangno ang LTO sa publiko nga dili gamiton ang ngalan sa ahensya alang sa personal nga interes. Giawhag usab ang katawhan nga i-report dayon sa labing duol nga buhatan sa LTO o kapulisan kung adunay masugatan nga mga indibidwal nga nagpakaaron-ingnon nga adunay awtoridad sa dalan.
