Bisan tuod walay kompirmadong lig-on ug dakong grupo nga gikonsiderar ang Armed Forces of the Philippines nga seryosong hulga sa pagsabwag og kagubot sa parliamentary elections sa Bangsamoro Autonomous Region in Muslim Mindanao, ang Philippine Army wala mikompyansa sa ilang mga katungdanan.
Matud ni Philippine Army spokesperson Col. Louie Dema-ala nga walay hunong ang ilang koordinasyon sa intelligence community para matuman ang hiniusang pagpatuman sa seguridad nga gipangayo sa Commission on Elections kauban ang Philippine National Police sa BARMM polls.
Basi sa ilang kaugalingong assessment sa rehiyon, wala silay nakitang grabeng problema sa seguridad gikan mismo sa campaign period sa Agosto 28 hangtod sa mismong adlaw sa piniliay sa umaabot nga Oktubre 13.
Hinuon, adunay standing order gikan sa national headquarters aron masiguro ang kahapsay aron ang mga botante kay gawasnong makabotar sa unang mga opisyal sa parliamentaryo sa BARMM nga gusto nilang pilion sa rehiyon sa Mindanao.
Kahinumdoman nga usa sa gigamit ni Presidente Ferdinand Marcos Jr. sa pag-postpone sa Barangay ug Sangguniang Kabataan Elections karong tuiga mao ang iyang tinguha nga tugotan ang Comelec ug pwersa sa estado nga makatutok sa kinatibuk-ang seguridad sa BARMM elections.
Nasayran nga ang labing dagkong mga kanhi rebeldeng Moro nga grupo nga nakig-away sa gobyerno sulod na sa pipila ka tuig ang mismong motigi sa ilang piniliay sa Oktubre 2025.
