Nigawas og pamahayag ang Capital Economics nga ang ekonomiya sa Pilipinas mahimong dili makaabot sa iyang Gross Domestic Product (GDP) nga target hangtod sa 2027 tungod sa padayong isyu sa mga anomaliya sa flood control projects.
Ang pag-uswag sa GDP gilauman nga moabot lamang sa 4% sa 2025, ubos sa target sa gobyerno nga 5.5-6.5%.
Gihisgotan ni Gareth Leather sa Capital Economics nga ang eskandalo sa kurapsyon magpadayon sa pagbug-at sa nasud sa sunod nga quarters ug posibleng mag-trigger pa sa pagtibhang sa rate gikan sa Bangko Sentral ng Pilipinas (BSP).
Nahibal-an na nga sa ikatulo nga kwarter, ang pagtubo sa ekonomiya mihinay sa 4%, ang pinakahinay sukad sa COVID-19.
Ang paggasto sa gobyerno mius-os usab ngadto sa P430.6 bilyones niadtong Oktubre, minus 7.76% gikan sa miaging tuig.
Bisan pa niini, ubos ang mga projection sa inflation, gipaabot nga moabot sa 1.6% karong tuiga ug mosaka lamang ngadto sa 2.4% sa 2026, sumala sa Capital Economics.
Nag-abli usab kini sa posibilidad sa dugang nga pagpagaan sa kwarta o monetary easing, tungod kay ang BSP nagpadayon sa pagpaubos sa key policy rate ngadto sa 4.5%.
