CENTRAL VISAYAS-Magpahigayon og mobile recruitment ang mga sakop sa Philippine Navy – Naval Forces Central sunod semana sa NAVFORCEN Naval Base Rafael Ramos, Barangay Looc sa dakbayan sa Lapu-Lapu.
Ang recruitment kay magsugod sa adlawng Lunes, Pebrero 17 ug matapos sa Biyernes, Pebrero 21.
Giawhag niini ang mga interesado nga mopasar sila sa Naval Officer Candidate Course (NOCC) o di ba kaha sa Sailor Baseic Course (SBC) aron makapadayon sa damgong maapil sa Hukbong Pandagat.
Matod sa PH Navy nga nagkinahanglan kini og dugang 2,000 ka mga bag-ong recruit busa gilusad kini nila nga kalihokan.
Sa NOCC, kinahanglan nga natural-born nga Pilipino, adunay gihuptang bachelor’s degree (labaw na kung technical nga mga kurso), dili moubos sa 5 foot ang gitas-on, anaay good moral character, himsog ang lawas ug pangutok, 20 ngadto sa 26 anyos, ug kinahanglan nga dili molapas sa 27 ang edad sa higayon nga madawat na pagka- probationary ensign o probationary Second Lieutenant.
Sa SBC sab kay kinahanglan sab nga natural-born nga Pilipino, nakakumpleto og 12 ka tuig sa basic education ubos sa K-12 program, o adunay 72 units sa kurso sa kolehiyo, o NCII holder sa Technical Education and Skills Development Authority (TESDA); labing minos 18 anyos ang pangidaron apan dili molapas sa 25 sa higayon nga madawat na isip kandidato pagka-marinero, dili moubos sa 5 foot ang gitas-on; adunay good moral character; ug himsog ang lawas ug pangutok.
Ang gikinahanglan nga mga dokumento mao ang diploma, Transcript of Records, kopya sa birth certificate gikan sa Philippine Statistics Authority, 2×2 ID picture nga puti ang background ug ang gisul-ob round neck nga sinina, duha ka valid IDs, ug TESDA NC II sa mang-apply sa SBC.
Giawhag kadtong intresado nga magparehistro nang daan aron dali na lang ang ilang pag-apply karong Pebrero 17-21, 2025 diha sa NAVFORCEN.
Ang NAVFORCEN maoy nadestinong sakop sa Philippine Navy sa tibuok tulo ka rehiyon sa Visayas.
