Giawhag sa Pilipinas ang mga miyembro sa Association of Southeast Asian Nations (ASEAN) nga magpabiling abli sa mga gustong mamuhunan o magnegosyo sa rehiyon sa Southeast Asia.
Atol sa pag-abli sa ika-29 nga tigom sa ASEAN Investment Area (AIA) Council, gipasiugda ni DTI Secretary Cristina Roque ang kamahinungdanon sa pagpausbaw sa pamuhunan sa rehiyon aron makab-ot ang pagtubo sa ekonomiya nga gitinguha sa mga nasod nga miyembro.
Matod ni Roque, ang pamuhunan usa ka mahinungdanong hinungdan sa pagpalig-on sa ekonomiya sa Southeast Asia ug pagpauswag sa kakayahan niini nga makigkompetensya.
Gipasiugda usab sa Secretary nga ang pag-abli sa rehiyon sa pamuhunan makatabang sa pagmintinar sa kakayahan sa ASEAN nga makigkompetensya ug dugang nga magpalig-on sa posisyon niini isip nag-unang destinasyon alang sa negosyo ug turismo sa rehiyon sa Asia-Pacific.
Sa laing bahin, gipadayag sa Sekretaryo nga dili paigo alang sa mga nasod sa Southeast Asia ang pagpakita lamang og pagkabukas sa pamuhunan; kinahanglan usab nilang ipadayon ang maayong rekord sa ilang mga kalihokan.
Ang mga investor padayon nga nagtimbang-timbang sa mga kondisyon, ug ang pagmintinar sa ilang pagsalig sa ekonomiya sa usa ka nasod hinungdanon alang sa padayon nga operasyon sa ilang mga negosyo.
Gipasiugda usab ni Secretary Roque ang panginahanglan nga daling i-upgrade ang ASEAN Trade in Goods Agreement (ATIGA).
Matod sa Sekretaryo, dako na ang kausaban sa palibot sa pamatigayon sa rehiyon sa Asia-Pacific; busa, ang pipila ka mga probisyon sa ATIGA kinahanglan nga usbon aron mahiuyon sa mga kalamboan sa rehiyon sa Southeast Asia. Pinaagi niini, siguradong mapalig-on ang pamatigayon, mga supply chain, ug mga oportunidad alang sa mga negosyo sa rehiyon.
