Miabot na sa upat ang ihap sa mga Pilipino nga gikatahong naangol sa pag-atake sa King Khalid International Airport sa Riyadh, Saudi Arabia, niadtong Sabado, Oktubre 10.
Tulo sa mga naangol ang kasamtangang anaa sa ICU, samtang ang usa gikatakdang ipagawas na gikan sa ospital, sumala sa pahayag nga gipagawas sa Department of Migrant Workers (DMW).
Ingon man nga walay natala nga mga Pilipino ang namatay sa maong pag-atake. Sa kinatibuk-an, 12 ka tawo ang namatay ug 309 ang naangol sa pag-atake sa mga Houthi sa King Khalid International Airport sa Riyadh niadtong Sabado.
Matud ni Labor Attaché Dominador Salanga ng Migrant Workers Office (MWO) sa Riyadh, uban sa Overseas Workers Welfare Administration (OWWA), nagpahayag nga padayon silang naghatag og gikinahanglang tabang ngadto sa mga naangol samtang nagpaalim sila sa nagkalain-laing mga tambalanan.
Dugang pa ni Salanga, nakig-alayon ang ilang buhatan sa mga lokal nga awtoridad ug mga ospital sa Riyadh aron masuta kung aduna pa bay laing mga Pilipino nga naangol sa maong pag-atake.
Gitambagan usab sa ahensya ang mga OFW sa Saudi Arabia nga likayan ang mga lugar nga posibleng target sa mga pag-atake ug maminaw sa mga pahibalo gikan sa embahada, konsulado, ug mga MWO sa Saudi Arabia, ingon man sa mga social media page sa gobyerno, alang sa mga update. Samtang, alang sa mga OFW nga gikatakdang mopauli sa nasud, gitambagan sila sa DMW nga makig-alayon una sa ilang airline sa dili pa moadto sa airport ug susihon ang mga email address nga gigamit sa booking, ingon man sa email sa ilang employer.
Gitambagan usab sa ahensya ang tanan nga dili magkuha og mga video o litrato sa maong mga pag-atake ug dili kini i-post sa social media, tungod kay ang pagbuhat niini usa ka paglapas sa balaod sa Saudi Arabia.
