Mipakita na usab sa iyang kahanas ang Pinay tennis sensation nga si Alex Eala human niya gipildi ang world No. 10 nga si Elina Svitolina sa quarterfinals sa DC Open.
Sa duwa nga gipahigayon sa Washington, D.C., midaog si Eala sa straight sets, 6-3, 6-4, aron sigurohon ang iyang luna sa semifinals sa maong prestihiyosong torneyo.
Sa unang set, nagbinayloay og puntos ang duha ka magduduwa sa wala pa mailog ni Eala ang 4-2 nga labaw ug gisirad-an ang set.
Pagsulod sa ikaduhang set, milayat si Svitolina sa 2-0 nga labaw, apan dali nga nakabawi si Eala ug mitali og tulo ka sunod-sunod nga daog aron sakmiton ang 4-3 nga bentaha.
Bisan tuod og natabla ang Ukrainian sa duwa nga 4-all, nagpabilin nga kalmado ang Pinay ug gitapos ang match pinaagi sa pagdaog sa kataposang duha ka game.
Ang maong kadaugan maoy dugang pamatuod sa kaabtik ni Eala human niya una nga gipildi si Svitolina sa Berlin Open niadtong Hunyo.
Sa semifinals, iyang ikasangka ang kanhi world No. 1 nga si Naomi Osaka, kinsa nag-una nga mipildi kang Elisabetta Cocciaretto.
Kini nga kadaugan maoy laing importanteng lakang sa batan-ong Pinay sa iyang pagsaka sa world tennis level.
