Gipadayon ni Alex Eala ang iyang impresibong kampanya sa Berlin Open human gipukan ang world No. 8 nga si Elina Svitolina sa sunod-sunod nga set, 6-3, 6-4, aron makaabante sa semifinals sa WTA 500 grass-court tournament sayo sa Sabado (oras sa Pilipinas).
Agresibo si Eala sa unang set ug daling nakakuha og 3-0 nga labaw gumikan sa mga unforced errors sa Ukrainian.
Bisan pa man sa mga pagsulay ni Svitolina nga makagukod, nagpabiling lig-on ang baseline attacks ug kompiyansa sa Filipina aron selyuhan ang unang set, 6-3.
Sa ikaduhang set, nagpadayon ang grabeng sangka sa duha diin nakatabla si Svitolina sa 2-2.
Apan gipakita ni Eala ang iyang determinasyon pinaagi sa pagdaog sa tulo ka sunod-sunod nga dula aron makuha ang 5-2 nga labaw.
Bisan pa man sa paggukod ni Svitolina ngadto sa 5-4, nagpabiling kalmado si Eala sa iyang serve ug gitapos ang dula sa score nga 6-4 aron aron selyuhan ang usa na usab ka impresibong kadaugan ug ang iyang puwesto sa semifinals.
