CEBU CITY- Dakong bahin sa Metro Cebu gibahaan niadtong adlaw sa Miyerkules, Hulyo 16, tungod sa kusog nga uwan sa tibuok maghapon.
Ubay-ubay nga mga video post sa social media sa mga netizen ang nagpakita nga gilawmon ang baha sa nagkadaiyang dapit sa Sugbo, gani ang uban nagtawag niini nga “resort” ug “ocean” tungod sa kataas niini ug gidugangan pa og pag-bawd kada higayon adunay dakong sakyanan ang muagi.
Apektado ang mga motorista ug residente sa Mandaue City, Lapu-Lapu City, Talisay City, Minglanilla, Cebu City, ug uban pa diin ang labing taas nga natala nga tubig baha niabot hangtod liog sa usa ka tao.
Ubay-ubay sab nga mga sakyanan ug motorsiklo ang nalubog sa baha sa pipila ka mga karsada diin gi-parking ang mga sakyanan.
Nakasinati sab ang mga motorista og grabeng trapik tungod kay dili sila makaagi sa kadalanan tungod sa tubig baha, mao nga bisan ang mga bus dili makagawas sa mga terminal tungod kay ma-stuck usab sila kon mobiyahe sila sa gitakdang oras.
Gani si Cebu City Councilor Dave Tumulak, ang Chairman sa City Committee on Disaster Management, nipahimangno sa publiko nga magmatngon sa panghitabo sa lakat sa panahon tungod sa risgo sa flashflood sa ubos nga mga dapit sa dakbayan ug pagdahili sa yuta sa mga bukirang bahin.
Sa laing bahin, gideklarar dayon ni Cebu City Mayor Nestor Archival Sr kagahapong adlawa ang suspension sa klase sa Night Schools ug nipakatap dayon og mga City Buses aron mohakot sa mga stranded nga pasahero sa dakbayan sa Sugbo.
