(Update) TAGBILARAN CITY– Dili pa gihapon makatoo ang mga higala, mga kabanay ug kaubanan sa legal profession sa pagkapatay ni Atty.Mia Manuelita Mascariñas-Green human nga gipusil sa riding in tandem.
Sa pakighinabi sa Bombo Radyo kang Mike Ligalig Ortega-Broadcast Journalist sa Bohol iyang giingon nga daghan ang nakaila ni Atty.Green nga usa kini ka maayong tao.
Matud pa ni Ligalig nga sagad sa mga kaso nga gigunitan sa biktima mga pro-bono cases sa mga kabos.
Gipadayag usab ni Ortega ang iyang personal acquaintance ni Atty.Green niadtong nagtoon pa siya sa college of law sa Holy Name University kung diin nahimo kini niya nga propesor.
Kagabii pasado alas 6 gideklarar nga patay si Atty.Green tungod sa naangkon niini nga mga samad pinusilan.
Nasayran nga alas 4 sa hapon gikuha sa biktima ang iyang mga anak sa tunghaan pero sa pag-abot sa Purok 2,Zamora St.,Brgy.Dao,Tagbilaran City kalit nga gipusil kini sa riding in tandem.
Sa karon gitutukan sa mga otoridad ang posible nga motibo sa pagpamusil.
