Gimandoan ni PNP Chief General Jose Melencio Nartatez Jr. ang pagpahigayon og dinaliang imbestigasyon may kalabotan sa giingong death threat batok kang Cebu Governor Pamela Baricuatro.
Sumala ni PNP Public Information Office chief Brigadier General Randulf Tuaño, gihangyo usab sa hepe ang mga police units sa Central Visayas nga pakusgan pa ang intelligence monitoring ug security operations sa rehiyon.
Dugang pa ni Tuaño, nagpadala na ang PNP og 14 ka dugang police security aides aron pagsiguro sa kaluwasan sa gobernador, ug kini nga lakang nagtumong sa pagpugong sa bisan unsang dautang plano ug aron mailhan ang mga tawo nga nagpaluyo sa maong pagpanghulga.
Kahinomdoman nga seryoso usab nga gibutyag sa Gobernadora ang nadawat nga intelligence report bahin sa usa ka “killer” gikan sa Mindanao nga gibayran matud pa og minilyon ka pesos aron siya mapatay.
Diin siya nagtoo nga kon dili siya maguba sa iyang mga kaaway pinaagi sa mga bakak nga istorya, ang pagtuldok na sa iyang kinabuhi ang sunod nga target niini.
Tungod niini, nangayo siya og pag-ampo ug padayong suporta gikan sa katawhan samtang nakigtambayayong siya sa mga awtoridad alang sa iyang seguridad ug sa pagkab-ot sa hustisya.
