Gipasiugdahan sa Cebu Provincial Public Employment Service Office (PESO) ang usa ka Local and Overseas Job Fair nga ipahigayon sa Cebu Provincial Capitol Compound karong adlaw sa Dominggo, Abril 19, 2026.
Nagtinguha kini sa pagdalit og oportunidad sa trabaho alang sa mga Sugboanon ilabi na kadtong jobseekers, balikbayan OFWs, ug bisan as mga pamilyang nangita og bag-ong karera sa pagpang-empleyo.
Ilusad niini ang “Bayanihan Para sa Balikbayang Manggagawa” nga usa ka dedicated National Reintegration Network (NRN) ug kamustahan session sa mga nanguli nga mga OFW balik diri sa Sugbo.
Itanyag ang 10,000 ka mga job vacancy nga gikan sa 23 ka employers diin mamahimo kining anaa ra diri sa atoa sa Sugbo o sa langyaw nga kanasuran.
Aduna sab iplastada nga One-Stop Shop sa kapin 30 ka mga ahensya sa gobyerno ug mga pribadong kumpanya aron mausa og lakaw sa mga bisita ang ilang mga katuyuang serbisyo.
Lain pasundayag niini kay ang mga libreng support and wellness activity sama sa libreng tupi (haircut), massage services, financial guide gikan sa usa ka banko, ug trade fairs sa pagpakita sa mga pamatigayon sa mga OFW.
Sa mensahe pa ni Cebu Governor Pamela Baricuatro, giawhag niini ang mga Sugboanon aron panghimuslan ang mga serbisyo nga gitanyag sa kagamhanan sa tinguha nga mahataga ang matag Sugboanon og mahinungdnaon ug stable nga trabaho.
Magsugod ang kalihokan sa alas 7 sa buntag og matapos sa alas 5 sa hapon didto sa Social Hall sa Cebu Provincial Capitol Building.
