Gikumpirma sa Philippine National Police (PNP) gahapon Martes nga nakita si Senador Ronald “Bato” dela Rosa nga mibiya sa Senado human sa insidente sa pagpamusil niadtong Mayo 13, 2026, sakay sa usa ka sakyanan nga narehistro kang Senador Robin Padilla.
Atol sa usa ka press briefing sa Palasyo, gipakita ni PNP chief Gen. Jose Melencio Nartatez Jr. ang video footage sa usa ka puti nga Toyota Fortuner nga mibiya sa Senado mga alas 2:30 sa kaadlawon niadtong Huwebes, Mayo 14.
Wala pa gipagawas sa PNP sa media ang tibuok video nga giingong nagpakita kang dela Rosa nga mibiya sa Senado.
Gidugang sa opisyal nga base sa imbestigasyon sa mga rekord sa PNP, ang sakyanan nga gihisgutan narehistro kang Padilla.
Gikumpirma usab ni Interior Secretary Jonvic Remulla nga si Padilla ang tag-iya sa sakyanan nga nakita sa footage.
Giangkon kaniadto ni Padilla nga ang sakyanan sa video iyaha, apan nagdumili siya sa pagkumpirma kung si dela Rosa ba gyud ang sakay niini.
Kahinumduman nga niadtong Mayo 11, mibalik si dela Rosa sa Senado sa unang higayon sukad niadtong Nobyembre 2025 aron mobotar pabor sa pag-ilis sa liderato sa Senado.
