Gibutang sa full alert ang Philippine National Police (PNP) human sa mga report sa giingong emergency rally sa usa ka relihiyosong organisasyon sa EDSA karong buntaga, Martes, Hunyo 30.
Sa usa ka pahayag, giingon ni PNP chief General Jose Melencio Nartatez Jr. nga hugot nga nagmonitor ang sitwasyon gikan sa PNP Command Center.
Nagpabilin sa lugar ang mga yunit sa pulisya ug nagpadayon sa koordinasyon uban sa mga hingtungdang ahensya aron masiguro ang kalinaw, kahusay, ug kaluwasan sa publiko.
Gipunting sa PNP chief ang pagpadayon sa mga operasyon aron mapanalipdan ang publiko, mapadayon ang hapsay nga dagan sa trapiko, ug masiguro ang malinawon nga sitwasyon samtang gitahod ang katungod sa mga nagprotesta.
Base sa banabana sa mga awtoridad, hangtod 7,000 ka tawo ang nagtigom sa People Power Monument sa EDSA-White Plains karong buntaga.
Sumala ni NCRPO Regional Director Maj. Gen. Anthony Aberin, wala pa makapakita ang grupo og permit nga nagtugot kanila sa pagpahigayon sa rally, nga nakaapekto sa dagan sa trapiko ilabi na sa rush hour sa buntag.
Gikumpirma sa Iglesia ni Cristo (INC) pinaagi sa usa ka pahayag nga supak sila sa umaabot nga pagpasaka og kasong plunder batok kang Senador Rodante Marcoleta.
Giinsistir usab sa INC nga ipadayon nila ang ilang panawagan alang sa hustisya bisan pa man kung mabilanggo ang senador.
