Kumpirmadong patay sa pinusilay ang usa ka opisyal sa kapulisan samtang naangol ang iyang kauban human sila kalit nga gi-ambush sa Sitio Balaw, Barangay Sudlon 2, Cebu City, gabii pasado alas 6, Oktobre 25, 2025.
Giila ang nakalas nga si Police Captain Joel Deiparine samtang ang naangol si Police Executive Master Sergeant Artchel Tero, ug ang duha kay susamang mga sakop sa Criminal Investigation and Detection Group (CIDG) Region 7.
Sumala sa inisyal nga mga taho, ang mga suspek giingong nakabantay sa duha ka pulis samtang nag-surveillance sakay sa motorsiklo. Pag-abot sa lugar, ang mga suspek giingong miatake sa mga pulis ug mipauwan og bala, nga miresulta sa kamatayon ni Captain Deiparine ug pagkaangol ni Master Sergeant Tero.
Gisuwayan pagdala sa tambalanan si PCPT Deiparine apan gideklarar nga dead on arrival sa Cebu City Medical Center (CCMC), samtang si PEMS Tero kasamtangang nagpaalim pa sa tambalanan.
Samtang, ang mga suspek giila nga sila si Leonardo Manto ug Renante Manto, mga residente sa Sudlon 2, samtang ang usa sa ilang mga kauban nakaikyas human sa insidente.
Sumala sa mga awtoridad, si Leonardo Rabago Manto Jr., alyas “Jun,” nadakpan na kaniadto sa kasong 10591 sa Pari-an Police Station 1, CCPO, niadtong Hulyo 6, 2023, pinaagi sa Warrant of Arrest.
Sa pagkakaron, ang CIDG uban sa Cebu City Police Office naglunsad og hot pursuit operation aron madakpan ang mga suspek.
