Gidayeg ni Pope Leo XIV ang kasaysayan sa Estados Unidos sa pag-abiabi sa mga imigrante, nga nag-awhag sa Amerika nga magpabilin nga matinud-anon sa mga mithi niini human sa kagawasan gikan sa kolonyalismo.
Sa usa ka mensahe gikan sa Vatican, gidawat ni Leo ang Liberty Medal gikan sa National Constitution Center sa Philadelphia. Niini, iyang giingon nga ang pulong nga “America” nahimong simbolo sa kagawasan sa tibuok kalibutan tungod sa pagkabukas niini sa mga imigrante.
Gidasig sa Santo Papa ang Estados Unidos nga isabuhay ang mga prinsipyo nga gilatid sa Deklarasyon sa Kagawasan, labi na samtang nagkaduol kini sa ika-250 nga anibersaryo isip usa ka gawasnon nga nasud.
Dugang usab niini nga importante alang sa Amerika nga magpabilin nga gigiyahan sa panaghiusa, hustisya, ug kalinaw nga gipasiugdahan sa mga founding fathers.
Gipasiugda usab ni Pope Leo ang kamahinungdanon sa pagpanalipod sa kinabuhi gikan sa tagoangkan hangtod sa natural nga kamatayon, ug miingon nga ang moral nga kusog sa usa ka nasud gisukod kung giunsa niini pagpanalipod ang mga mahuyang ug gidaugdaug.
Bisan kung wala niya nahisgutan ang Presidente sa Estados Unidos nga si Donald Trump o uban pang mga lider, ang Papa kaniadto nagsaway sa pipila ka mga palisiya sa imigrasyon, nga gitawag kini nga dili tawhanon.
Si Pope Leo, lumad nga taga Chicago, wala na mobalik sa Estados Unidos sukad siya napili nga Santo Papa niadtong 2025, apan miapil sa pipila ka mga kalihokan pinaagi sa video message.
