TAIWAN-Gikatahong duha ka tawo ang patay samtang gatusan na ang nasamdan, sa pagtugpa sa bagyong Gaemi sa sidlakang baybayon sa Taiwan, duol sa siyudad sa Hualien.
Human sa pagkuso-kuso niini sa Pilipinas nga gihinganlan nga Bagyong Carina nga nahimong super typhoon ug nagbilin og grabeng kadaot ug kakulba.
Gilauman nga mosaka pa ang ihap sa nakalas ug naangol, ingon man ang danyos hilabi na nga mao kini ang giisip nga labing kusog nga bagyo nga moigo sa isla sulod sa walo ka tuig.
Gani, tungod sa hulga sa bagyo, gikanselar ang pinakadako nga tinuig nga military drills sa isla.
Kauban sa mga nakanselar ang halos tanan nga domestic flights ug kapin sa 200 international flights.
Nipasidaan usab ng mga otoridad sa mga posibleng pagdahili sa yuta ug pagbaha, labi na sa mga kilid sa bukid nga naigo sa pinakadako usab nga linog niadtong Abril.
