Gihimo sa Department of Justice ang unang pasiunang imbestigasyon sa mga reklamo nga gisang-at sa Securities and Exchange Commission batok sa mga Villar ug mga kompanya.
Bisan tuod ang mga Villar ‘no show’ atol sa hearing, girepresentahan sila sa ilang tagsa-tagsa ka abogado.
Sumala ni Senior Deputy State Prosecutor Peter Ong, usa ra ka tawo ang nagsumiter og ‘counter-affidavit’ sa prosekusyon, mao si Garth Castañeda.
Ang uban wala magsumite og counter-affidavit tungod kay miingon sila nga nagpadala na sila sa ilang opisina og ‘omnibus motion’.
Gipaambit ni Prosecutor Ong nga ang mosyon nga gisumite sa mga respondents naglakip sa pagsuspenso sa pagpahigayon sa pasiunang imbestigasyon, ang pagbawi sa subpoena ug ang pagbalik sa kaso ngadto sa Securities and Exchange Commission.
Busa, matod niya, giisip kini sa prosekusyon nga usa ka ‘motion to dismiss’ nga magsilbing ‘counter-affidavits’ sa mga respondents.
Apan, sumala sa abogado sa kampo sa mga respondents, mopasaka gihapon sila og lahi nga counter-affidavit ngadto sa prosekusyon.
Samtang ang panel sa mga prosecutor mitugot sa ilang hangyo alang sa dugang nga panahon sa pagpasaka sa ilang tagsa-tagsa ka counter-affidavit.
Lakip sa mga respondents mao ang kompanya nga Villar Land Holdings Corporation, Manuel Villar Jr, Cynthia Villar, Cynthia Javarez, Camille Villar, Mark Villar ug uban pa.
Nag-atubang sila og mga kaso sa paglapas sa Sections 24.1 (b), 24.1 (d) 26.3, 27.1 sa Republic Act No. 8799, o market manipulation, insider trading ug misleading disclosures.
