Gihimakak ni President Ferdinand Marcos Jr. nga usa lamang ka drama o staged drama ang pag-aresto sa iyang ig-agaw nga si kanhi House Speaker ug Leyte Representative Martin Romualdez kalabot sa kontrobersyal nga kasong plunder nga nagkantidad og ₱7.4 bilyones.
Matod ni Marcos, ang mga alegasyon nga usa lamang kini ka stunt, kabahin sa mga pag-atake sa politika batok sa iyang administrasyon ug dili nagpakita sa tinuod nga proseso sa hustisya.
Giaresto si Romualdez human nagpagawas ang Sandiganbayan og opisyal nga warrant of arrest base sa kasong gipasaka sa Office of the Ombudsman.
Kasamtangan siyang anaa sa Philippine General Hospital (PGH) alang sa usa ka independent medical examination human siya gibalhin gikan sa Cardinal Santos Medical Center.
Samtang, gipasiugda ni Interior Secretary Jonvic Remulla nga wala gyud manghilabot ang Presidente sa pag-aresto sa kanhi lider sa Kamara.
Giila sa kalihim nga sakit alang sa Presidente ang maong sitwasyon tungod sa ilang suod nga relasyon, apan gipasabot niya nga kabahin kini sa gikinahanglang mga tahas sa gobyerno ug obligasyon sa pagpatuman sa balaod.
