Gipasalig ni President Ferdinand Marcos Jr. nga magpadayon ang gobyerno sa pag-dredge o paglimpyo ug pagpalalom sa mga suba ug kanal aron makatabang sa pagpakunhod sa pagbaha.
Sumala ni Marcos, adunay na’y epekto ang mga proyekto sa Department of Public Works and Highways (DPWH), apan daghan pa gihapong kinahanglan nga ayuhon.
Gimando usab niya ang pagkompleto sa spillway sa Las Piñas aron mas mapaspas ang pag-agos sa tubig.
Matud niya, kinahanglan susihon ang plano ug himuon ang tanang gikinahanglang lakang aron makompleto kini.
Nibisita si Marcos sa Las Piñas City karong buntaga aron susihon ang nagpadayong mga lakang sa gobyerno, ilabina ang Oplan Kontra Baha.
Ang Las Piñas usa sa mga lugar nga grabeng naapektuhan sa kaylap nga pagbaha nga gipahinabo sa Habagat.
