Gidapit ni Senador Alan Peter Cayetano si Senador Panfilo “Ping” Lacson ug ang publiko sa pagbisita sa Taguig City.
Matud pa ni Cayetano, pinaagi niini makita ang mga proyekto sa imprastraktura sa siyudad ug mapamatud-an nga walay mga anomaliya.
Miingon si Cayetano nga ang giingong mga anomaliya naglakip sa giingong recycled nga mga litrato sa billing ug collection.
Una nang giakusahan ni Lacson nga adunay giingong mga anomaliya sa pipila ka mga proyekto sa imprastraktura sa Taguig City.
Giingon usab ni Lacson nga si Cayetano maoy nagkontrol sa operasyon sa Department of Public Works and Highways (DPWH) sa siyudad pinaagi sa “virtual” nga paagi.
Sa iyang social media account, gipasalig ni Cayetano nga andam nilang tubagon ang tanang pasangil nga gibato batok kanila, tungod kay kombinsido siya nga hapsay ug transparent ang pagdumala sa Taguig City.
Giinsistir usab ni Cayetano nga kon moadto si Lacson ug ang publiko sa mga proyekto, mapamatud-an nila ang tinuod nga kahimtang ug masusi ang sulod sa mga dokumento ug litrato nga gipakita.
Dugang pa ni Cayetano, kaniadto dako ang iyang pagrespeto kang Lacson isip usa ka politiko, apan karon nausab na ang iyang pagtan-aw. Bisan pa niini, naglaom gihapon siya nga mausab ang panglantaw sa senador.
Base sa lima ka case studies, miingon si Lacson nga ang iyang mga kawani nakadiskubre og giingong mga anomaliya, lakip ang doble nga alokasyon alang sa samang proyekto ug nagsapaw-sapaw nga mga proyekto sa pagpanalipod sa bakilid nga nagkantidad og milyon-milyong piso.
