Gikuwestiyon ni Senador Panfilo “Ping” Lacson ang P1.939-trilyon nga pondo nga gigasto sa Department of Public Works and Highways (DPWH) alang sa flood control projects gikan 2011 hangtod 2025.
Sumala kang Lacson, dako na ang kantidad sa pondo nga gigahin alang sa flood control, apan padayon gihapon ang grabe nga pagbaha sa nagkalain-laing bahin sa nasud, lakip ang Metro Manila, ilabina panahon sa kusog nga pag-ulan tungod sa Habagat.
Sa iyang post sa X, giingon ni Lacson nga ang maong kantidad nagpasabot sa dakong gasto sa gobyerno matag adlaw sulod sa 15 ka tuig.
Pinakadako ang annual flood control budget niadtong 2025 nga mikabat sa P372.8 bilyon, gisundan sa P346.7 bilyon niadtong 2024 ug P287 bilyon niadtong 2023.
Tungod niini, giingon ni Lacson nga kinahanglan susihon ang pagkaepektibo ug implementasyon sa mga flood control projects sa DPWH, ilabina sa mga lugar nga padayon nga gibahaan bisan pa sa dako nga pondo nga gigahin.
Kaniadto, nagpasaka usab si Lacson og mga alegasyon kabahin sa giingong anomalous nga flood control projects sa Bulacan ug Oriental Mindoro.
Nakapasa usab siya og mga dokumento sa Office of the Ombudsman may kalabotan sa pipila ka giingong anomalous nga proyekto ug mga kalihokan sa reclamation sa Taguig City.
