CEBU CITY-Gipahimangnoan sa PRO-7 kadtong nanguha og kuwarta nga nahulog sa bag sa usa ka kolektor sa SRP nga iuli kini.
Gibutyag ni Police Lieutenant Colonel Gerard Ace Pelare, ang tigpamaba ni PRO-7 Director Police Brigadier General Anthony Aberin, nga kadtong dili mobuhat niini pasakaan og kasong pagpangawat.
Gumikan kay ang kapulisan sa rehiyon nitabang sa imbestigasyon sa mga tawo nga mipunit sa kuwarta nga nagkatag sa South Road Properties (SRP) niadtong Martes, Hulyo 4.
Gipahinumdoman ni Pelare ang mga hingtungdan nga iuli ang kuwarta kay moral ug legal nilang obligasyon ang pagbuhat niini.
Matud ni Pelare nga nagsugod na sila sa pagtan-aw sa mga video aron mailhan ang mga nakakuha sa kuwarta ug nakig-alayon usab sila sa Land Transportation Office (LTO) ug Cebu City Traffic Enforcement aron mailhan ang mga tawo nga nalambigit.
Sa dul-an P4 milyones nga gitipigan sulod sa bag sa adlaw sa insidente, nakuha sa kolektor ang P2,00,083 ug ang uban padayung pang na missing.
Niadtong Martes, dunay mga matinud-anon nga sibilyan nga mi-turn over sa P21,150 sa police station sa Mambaling ug P13,500 sa Carbon Police Station.
Samtang niadtong Miyerkules, ang mga sibilyan niuli og P10,200 ug P3,050 ug niadtong Huwebes, adunay P10,700 ang nakolekta.
Niadtong Biyernes, tulo ka adlaw human sa insidente, ang kolektor nakarekober og P2,058,683. Naa pay P1,941,3 nga wala mabalik.
Kahinumduman nga nawad-an ang collector nga si John Mark Barrientos, og dul-an sa P4 milyones nga cash dihang kalit nga nabuak ang zipper sa iyang bag samtang nagsakay sa iyang motorsiklo subay sa northbound lane sa Cebu South Coastal Road (CSCR) niadtong Martes sa hapon.
Matod sa kolektor nga wala siya makabantay nga nangahulog na ang kuwarta gikan sa bag hangtod nga usa ka drayber nga nagsunod kaniya ang nitug-an sa nahitabo.
