CEBU, PHILIPPINES- Nipahigayon og press briefing sa International Media Center (IMC) sa Sugbo si Malacañang Press Officer ug Undersecretary Claire Castro alang sa ika-48 nga ASEAN Summit 2026 ug uban pang kalihokang may kalabutan sa maong miting. Nihatag usab kini og updates kabahin sa kasamtangang kalihokan sa nasud ug mitubag sa mga pangutana gikan sa national ug Cebu media, lakip na ang Bombo Radyo Cebu ug Bombo Radyo Philippines.
Atol sa press briefing, gipresentar ni Castro ang video message ni Presidente Ferdinand Marcos Jr. alang sa ASEAN Summit sa Sugbo, diin gipasiugda sa Presidente ang panginahanglan alang sa mas lig-on nga kooperasyon sa rehiyon samtang ang Pilipinas maoy host sa ika-48 nga ASEAN Summit.
Sa iyang mensahe, gilatid ni Marcos ang mga prayoridad sa summit nga naka-focus sa enerhiya, seguridad sa pagkaon, ug pagpanalipod sa mga lungsuranon sa ASEAN. Matud pa sa Presidente, isip ASEAN Chair karong tuiga, adunay dakong responsibilidad ang Pilipinas sa pagtabang sa paghulma sa kaugmaon sa rehiyon taliwala sa nagkakomplikadong kahimtang sa kalibutan.
Gibase sa temang “Navigating Our Future, Together,” gihulagway usab ni Marcos ang papel sa Pilipinas isip usa ka nasud nga komitado sa pagtukod og malinawon, mauswagon, ug people-centered nga ASEAN.
Samtang sa maong press briefing, gisaway usab ni Castro si Bise Presidente Sara Duterte tungod sa mga komentong nagkuwestiyon sa tubag sa gobyerno sa krisis sa Middle East.
Atol sa pakigsulti ni Duterte sa iyang mga supporters sa The Netherlands, giingon niini nga ang nasud nag-atubang og “triple whammy” tungod sa pagsaka sa presyo sa gasolina, paghuyang sa peso, ug pagsaka sa inflation.
Tubag ni Castro, busy si Presidente Marcos sa mga miting sa ASEAN ug sa pagtubag sa mga kabalaka sa rehiyon, samtang si Duterte anaa na usab sa gawas sa nasud ug busy sa bakasyon.
Gibutyag usab ni Castro nga sa unang adlaw pa lamang sa pagsaka sa tensyon sa Middle East, nagmando na si Marcos sa mga ahensya sa gobyerno aron matabangan ug ma-repatriate ang mga Overseas Filipino Workers (OFWs).
Dugang pa niini, gimandoan usab sa Presidente ang Department of Social Welfare and Development (DSWD) sa pag-andam og ayuda alang sa mga drayber sa public utility vehicles (PUV), motorcycle taxis, ug uban pang sektor nga naapektuhan sa pagsaka sa presyo sa petrolyo.
Gipasigarbo usab ni Castro ang fuel subsidy program ug ang TUPAD Project isip kabahin sa mga lakang sa gobyerno aron maibsan ang epekto sa krisis.
Tungod niini, gisaway ni Castro ang Bise Presidente ug miingon nga usa kini ka pananglitan sa usa ka opisyal sa gobyerno nga pirming naa sa bakasyon ug wala na mahibalo sa mga programa ug lakang nga gipatuman sa administrasyon.
