Gipangandaman na sa Police Regional Office–Central Visayas (PRO-7) ang dugang deployment sa mga personahe ug assets alang sa umaabot nga mga semana aron masiguro ang Sinulog Festival sa Cebu City, samtang nangandam usab alang sa mga meeting sa Association of Southeast Asian Nations (ASEAN) nga gikatakda sa Bohol sa sayong bahin sa sunod tuig.
Kini ang gipahibalo ni Police Brigadier General Redrico A. Maranan, Regional Director sa PRO-7, nga ang deployment sa seguridad ipahigayon sa hugna-hugna aron masiguro nga igo nga mamonitor sa kapulisan ang duha ka dagkong kalihokan.
Alang sa Sinulog Festival, nagplano ang PRO-7 nga dugangan og hangtod 1,100 ka personahe sa Philippine National Police (PNP).
Sa mao nga ihap, 290 niini mga opisyal nga unang ipadala samtang ang uban moabot by batch.
Ang mga personahe kuhaon gikan sa Eastern Visayas, Western Visayas, ug Negros Island Region, ug ang transportasyon ipahigayon pinaagi sa pagbiyahe sa dagat, nga gi-coordinate sa mga ahensya sa maritime sa gobyerno.
Sumala ni Maranan, gikinahanglan ang phased deployment tungod kay ang PRO-7 dungan usab nga gitahasan sa pagsiguro sa mga miting nga may kalabutan sa ASEAN sa Bohol, diin gilauman nga magsugod ang pag-abot sa mga delegado sa tunga-tunga sa Enero 2026.
Matod pa niya, magpabilin ang heightened alert status hangtod sa pagtapos sa Sinulog Festival ug sa mga miting sa ASEAN.
