CENTRAL VISAYAS- Gibutang na sa heightened alert ang tanang yunit sa Police Regional Office 7 (PRO7) isip pagpangandam sa posibleng epekto sa Tropical Storm Basyang, nga gilaumang makaapekto sa Central Visayas.
Gipalihok sa PRO7 ang ilang mga kahinguhaan human mapahigayon ang komprehensibo nga inventory sa mga personahe, sakyanan sa yuta ug dagat, kagamitan sa pagluwas, sistema sa komunikasyon, ug uban pang emergency response equipment.
Sumala ni PBGEN Redrico A. Maranan, Regional Director sa PRO7, andam ang pwersa sa pulisya sa paghatag og tabang ug pagpanalipod sa katawhan sa bisan unsang emerhensya.
Gimandoan usab sa PRO7 ang tanang Provincial ug City Police Offices nga pakusgan ang koordinasyon sa LGU ug DRRMC, lakip ang 24-oras nga pagmonitor, pre-emptive deployment sa mga high-risk areas, tabang sa posibleng evacuation, traffic management, ug pagsiguro sa kalinaw ug kahusay sa wala pa, atol, ug human sa bagyo.
Dugang pa niini, nga ang Reactionary Standby Support Force ug ubang yunit sa pulisya karon naka-standby alang sa diha-diha nga pag-deploy kon motumaw ang panginahanglan.
